miércoles, 29 de junio de 2016

Dedos de vento



 



















Herbert
Joven tocando el arpa



 A melodía dos anos
é unha metáfora da vida,
lenta,calada,
ouricelada na pel
con pingas
de ledicia e pranto.
Unha melodía de arpa
pulsada
polos dedos do vento,
doces acordes de solpor
que avanzan
mansamente
diluídos no tempo.



martes, 17 de mayo de 2016

A miña fala


















 Foto xanela




Cada palabra que eu digo
é o campo
é o mar
é a vida
nun respiro.
            
cada palabra que eu digo
é a raíz
é o canto
é a esencia
desta terra
que sempre
levo conmigo

cada palabra que eu digo
é a fala dos meus pais
é a fala dos meus fillos

Galicicia
dos meus quereres
tan afeita a loitar
por soños interrumpidos.



 

lunes, 1 de febrero de 2016

Na praia da Lanzada



















Foto xanela



Un cántico de olas esvara
pola area
e ven a mín  sobre  finísimos
patíns brancos.
Pura letanía que se agocha
entre  as dedas dos pés
e as horas baixas.

Unha mestura de emocións
danzan no caletre.
Van e veñen
coa mesma cadencia
da auga.

Paseniño,  paseniño
esparexen con lene murmurio
igual  cas pegadas
da gaivota.



viernes, 29 de enero de 2016

Un novo alento
















 Foto xanela

 

Non sempre é doado saír
do abafamento
dun  río de augas turbulentas,
que ten presa, que te leva
sempre cara abaixo.
Coma unha sombra impalpable
que loita mergullada
no fondo do abismo,
saca forzas
das entrañas do frío
e sae fora da auga,
e respira,
respira con tódalas
forzas da súa alma
o apreciado alento
do paxariño,
o que marca a curta
distancia entre a luz
e o tempo.







sábado, 23 de enero de 2016

Sombras alongadas



















Hoxe é unha tarde desas,
morriñenta, apócrifa, irreal.
a néboa
bota man das almas,
choran as pedras
e a tí
dáseche por pensar…

Sombras alongadas
pérdense na eternidade.

Sacudes este chumbo,
este inverno que esnaquiza
e vas na procura
de nítidos espellos.

Un bico
unha aperta
a cálida palabra,
penetran tan mainiño
coma o poallo de fora.


(Marisa Pintos López)