Caída da folla

Foto xanela

Orballo que molla
a mañán presente
ven da lene frescura
que acariciou a noite

xa está na árbore
a morte latente
xa está en min
outono que nace.

Preludio de outono

Pegómez(Rio Lerez)



Xa non cantan
xa non cantan as augas,
tan soltas tan brincadeiras
a miña canción do verán
por entre as pedras do río

son as primeiras follas douradas
que en voo lento, suave
pousadas na súa canle
me van marcando outro ritmo.

Fugacidades

Imaxe de internet

Bogando mar adentro
nesta barca que me leva
tan feble tan sinxela…
non é doado
cruza-lo infinito dos océanos,
chegarei ata onde chegue
o segredo da luz
o arrecendo do sal
a onda na area,
a voz do poema.

Un novo día

Joaquín Sorolla

Cando agardas
un tempo de lecer
en fulgurante espello
de auga en calma
aparece un amencer de chumbo
envolto na néboa branca

non desesperes amor
pintarei para ti
un ceo sen nubes
un sorriso de sol
un mar de auga clara
un bico de amor
na praia dourada.